Selektor Per Johanson, nakon pobjede na startu Svjetskog prvenstva, nije bio zadovoljan izdanjem ,,lavica“.
- Nijesam zadovoljan izdanjem koje smo prikazali, ali mogu da budem zadovoljan što smo slavili sa četiri gola razlike. Odigrali smo dobro u odbrani u posljednjih 15-20 minuta, a u tim trenucima do izražaja je došlo i iskustvo naših igračica koje su riješile neke situacije u napadu. Senegal je očekivano, pokazao da je ozbiljan protivnik, ali u prvom poluvremenu su imale više energije od nas i to je nešto što ne smijemo da dozvolimo - kazao je Johanson.
Selektor je pojasnio i situaciju oko povrede Katarine Bulatović koja je igru napustila u 16. minutu zbog povrede skočnog zgloba.
- Katarina je dobila zeleno svjetlo da nastupi u drugom poluvremenu, ali sam je poštedio, kako bi bila spremna za nastavak šampionata. Nije u pitanju ozbiljnija povreda - kazao je Johanson.
